ეთგარ კერეთი

ეთგარ კერეთი ისრაელში, პოლონური წარმოშობის ოჯახში დაიბადა. მწერალი ისრაელის კინოსა და ლიტერატურული წრეების ერთ-ერთი გამორჩეული ფიგურაა. მისი მოთხრობები თარგმნილია სხვადასხვა ენაზე და გამოცემულია მსოფლიოს მრავალ ქვეყანაში, მათ შორის, საქართველოში.

კერეთი მოთხრობების გარდა გრაფიკულ რომანებს, დოკუმენტურ პროზასა და ტელე-კინოსცენარებსაც წერს. მის ნაწარმოებებს გამორჩეულ ხიბლს ანიჭებს სახასიათო შავი იუმორი და სხარტი, სლენგით მდიდარი ენა.

კერეთის შემოქმედება ხშირად ისრაელსა და ახლო აღმოსავლეთში მიმდინარე მოვლენებს ეხმიანება. მისი სიურრეალისტური, ამავე დროს, ადამიანურ რეალობასთან ახლომდგომი სიუჟეტები სცდება გეოგრაფიულ საზღვრებს და მსოფლიოს ნებისმიერ კუთხეში მცხოვრები ადამიანისთვის ახლობელია.

ეთგარ კერეთის მოთხრობების კრებული „უეცრად კარზე აკაკუნებენ“ ქართულად 2016 წელს გამოიცა. ამავე წელს მწერალი საქართველოსაც ეწვია და მკითხველთან შეხვედრები გამართა.