იტალო კალვინო

თუ ზამთრის ღამით მოგზაური

წელი: 2018
ყდა: რბილი
გვერდები: 300
ფორმატი: 13.00 X 19.50
ISBN: 9789941238895

გაზიარება

მთარგმნელი: ხათუნა ცხადაძე

პოსტმოდერნული რომანი. ჰიპერრომანი. მეტარომანი. ათასნაირად მოინათლა კალვინოს ეს წიგნი გამოსვლისთანავე. მკითხველი მინიშნებას, დახმარებას, ინტერპრეტაციის გასაღებს, მწერლის განზრახვას ეძებს ამ წიგნში, გზას, რომელსაც დაადგება, ამბავს, რომელსაც დაამთავრებს. ცდილობს, გაუმკლავდეს ამ უცნაურ ენობრივ და სტილისტიკურ თამაშს, გამოაღწიოს დაწყებული, ერთმანეთში გადამავალი და უკვალოდ გამქრალი ამბების ხლართიდან, არ შეეგუოს აზრს, რომ მის ცნობისმოყვარეობას დაკმაყოფილება არ უწერია. დაბოლოს, როცა წიგნს ხურავს, ხვდება, რომ იმ გზის გასავლელად, იმ წრედის შესაკრავად სულაც არ ყოფილა აუცილებელი ამბის დასრულება. მეტიც: ისიც კი არ ყოფილა აუცილებელი, ამბავს დასასრული ჰქონოდა.  

იტალო კალვინო (1923-1985) თანამედროვე იტალიური ლიტერატურის ერთ-ერთი ყველაზე მნიშვნელოვანი ავტორია. იტალიური პოსტმოდერნული პროზა სწორედ კალვინოს რომანებით იღებს სათავეს. მსოფლიო მკითხველისთვის კალვინო ცნობილია ტრილოგიით „ჩვენი წინაპრები“, რომანებითა და კრებულებით „მარკოვალდო“, „ობობის ქსელის ბილიკები“, „უხილავი ქალაქები“, „თუ ზამთრის ღამით მოგზაური“, „კოსმოკომიკური ამბები“, „იტალიური ზღაპრები“ და სხვა.

რეცენზია

07 მაისი 2018

კალვინოს რთული თამაში

იტალო კალვინოს „თუ ზამთრის ღამით მოგზაური“ არის რომანი, რომლის მთავარი პერსონაჟიც შენ ხარ, მკითხველი, ადამიანი, რომელიც ამ წიგნს გადაშლი და პირველივე გვერდებზე ამოიკითხავ, რომ ზამთრის ღამის მოგზაური საკუთარ თავს, უბრალოდ, „მეს“ უწოდებს; რომ სახელი არ აქვს წიგნის იმ პერსონაჟსაც, რომელიც მთელ ამ აბურდულ და დანაწევრებულ ამბავს მოგვითხრობს, და უფრო მეტიც - ის პირდაპირ გვეუბნება, რომ შენ (მკითხველი) წიგნის ნაწილი ხარ, შენ ხარ ის, ვინც ეს გაბნეული ისტორიები უნდა შეაკოწიწოს, და რომ „კითხვა პროცესია, რომელსაც ობიექტი არ გააჩნია.“ „თუ ზამთრის ღამით მოგზაური“ პირველი თავია, პირველი ამბავი მატარებლის სადგურზე აღმოჩენილი კაცისა, რომელსაც წიგნში მოთხრობილ სხვა ამბებთან კავშირი არ აქვს. მოგვიანებით თქვენ შეგხვდებათ დაბა მალბორკის შემოგარენში; უფსკრული, სადაც ჩრდილები მუქდებიან; გადახლართული და ურთიერთგადამკვეთი ხაზების ქსელები - სხვადასხვა ისტორია სხვადასხვა დროსა და სივრცეში (და, სხვათა შორის, დროის და სივრცის საკითხს კალვინო წიგნში რამდენჯერმე წამოჭრის), რომლებსაც საერთო მხოლოდ ის აქვთ, რომ გარწმუნებენ: „ნებისმიერი ამბის არსს ორი მხარე აქვს: სიცოცხლის გაგრძელება და სიკვდილის გარდაუვალობა.“ რომანის ძირითადი სიუჟეტური ხაზი თითქოს გამქრალი და აკრძალული წიგნების ძებნის, მათ ავტორთა დადგენის, წიგნების ფალსიფიკაციის, მკითხველი კაცისა და მკითხველი ქალის უცნაური სასიყვარულო ურთიერთობის გარშემო ვითარდება. თუმცა, როცა იტალო კალვინოს ამ წიგნზე საუბრობ, ძნელია გადაჭრით თქვა, რაზე და ვისზეა წიგნი. ავტორს გამუდმებით ჩიხში შეყავხარ. თავიდან მთავარი პერსონაჟი ლუდმილა გგონია - მკითხველი ქალი, რომელზეც ამბის მთხრობელია შეყვარებული. შემდეგ - ფალსიფიკატორი მარანა, მთელ მსოფლიოში მოდებული ქსელით. მოგვიანებით გიჩნდება ეჭვი, რომ ლუდმილას და მარანას ისტორიებს ავტორი იმისთვის გიყვებოდა, შემოქმედებით კრიზისში მყოფი ირლანდიელი მწერლის, სილას ფლანერის უჩვეულო შემთხვევამდე მიეყვანე. თუმცა, გაიგებ ფლანერის ამბავსაც და ხვდები, რომ ეს გამუდმებული დევნაა, დაუსრულებელი ძიება, რომელშიც მკითხველიც პერსონაჟივითაა ჩართული და რომელსაც, ღმერთმა უწყის, ექნება თუ არა დასასრული. იტალო კალვინოს „თუ ზამთრის ღამით მოგზაური“ რთული თამაშია, თხრობის, ენის თუ სტილის თვალსაზრისით. ჩახლართული ამბების ჯაჭვი, სადაც გასაღები ამბების არსია და არა მსგავსება ფორმაში. ასეთ იმპროვიზაციას ლიტერატურული თამაშების ღმერთთან, ხულიო კორტასართანაც კი ვერ შეხვდებით. წიგნი მეტარომანად, ჰიპერრომანად შეაფასეს და ის მართლაც უნიკალური პოსტმოდერნული რომანია, სრულიად უჩვეულო იტალო კალვინოსთვისაც კი, რომელმაც იტალიურ პოსტმოდერნულ პროზას დაუდო სათავე. ასე რომ, „შეპყრობილ მკითხველებს“ და მაძიებლებს წინ დიდი პარტია გელით, ქაოსური და ჩამთრევი, პარტია, რომლის გამოტოვებაც უბრალოდ დაუშვებელია.

მიმოხილვები და კომენტარები:

13 .90 ¢
ან შეიძინეთ 139 .00 ბონუს ქულით
კალათაში ჩამატება
+ 13.90 ბონუს ქულა
წიგნის შეძენისას