საიტზე წიგნების შეძენა დროებით შეჩერებულია. ბოდიშს გიხდით შეფერხებისთვის.
ვირჯინია ვულფი

ორლანდო

წელი: 2018
ყდა: მაგარი
გვერდები: 286
ფორმატი: 14.50 X 21.50
ISBN: 9789941239519

გაზიარება

მთარგმნელი: ლელა დუმბაძე

ორლანდო, რომელიც ახლად დავაჟკაცებული ჭაბუკი გახლდათ, ფლობდა უცნაურ ზემოქმედების ძალას _ აეფორიაქებინა ადამიანების ფანტაზია და ის თვალი მიეპყრო, რომელიც მის ხსოვნას გაცილებით დიდხანს შემოინახავდა ცოცხლად, ვიდრე სხვა, უფრო სიცოცხლისუნარიან თვისებებს შესწევთ უნარი, არ გაქრნენ დროში.  ამ იდუმალ გრძნებას სილამაზის, წარმომავლობის და რაღაც, უფრო იშვიათი ნიჭის ერთობლიობა ქმნიდა, რომელსაც შეიძლება ელვარე ხიბლი ვუწოდოთ.
ვირჯინია ვულფი (1882-1941) აღიარებულია XX საუკუნის ერთ-ერთ ყველაზე გავლენიან მოდერნისტ მწერლად და ნოვატორად. იგი ცნობილ ინტელექტუალთა "ბლუმსბერი ჯგუფის" დამფუძნებელია. ჯეიმზ ჯოისის კვალდაკვალ იგი პირველთაგანია, ვინც შეიმუშავა და გამოიყენა "ცნობიერების ნაკადის" სტილი ლიტერატურაში (რომანები "გზა შუქურისკენ", "მისიზ დელოვეი", "ტალღები" და სხვ.). 
"ორლანდო" სრულიად განსხვავებული სტილისტიკის რომანია, ორიგინალური ფანტასმაგორია, სადაც ავტორი ჟამთააღმწერლად გვევლინება და მსუბუქი ირონიით, ხანაც მძაფრი სატირით ხატავს იშვიათი გარეგნობისა და პოეტური ნიჭით დაჯილდოებული დიდგვაროვანი ინგლისელი ჭაბუკის ზღაპრულ მოგზაურობას საუკუნიდან საუკუნეში, სამყაროდან სამყაროში, მის გარდასახვას მამაკაციდან ქალწულად და შემდეგ შეყვარებულ ქალად... 
ვირჯინია ვულფის ამ რომანმა საგრძნობი ზეგავლენა მოახდინა XX საუკუნის ლიტერატურაზე და იგი დღესაც მუდმივი მჯელობის და კვლევის საგანია. 

რეცენზია

07 მაისი 2018

ამბავი ადამიანზე, რომელიც ჯერ კაცი იყო და მერე - ქალი

    „ორლანდო“ მეოცე საუკუნის ლიტერატურის ერთ-ერთი ყველაზე გამორჩეული ავტორის და ქალ მწერლებში ლამის ღმერთად აღიარებული ვირჯინია ვულფის ფანტასმაგორიული რომანია, რომლის მთავარი პერსონაჟი სამ საუკუნეს ცხოვრობს. წიგნის პირველ ნახევარში ორლანდო ბიჭია - ბუნებისა და ქალების მოტრფიალე, მე-ზე ორიენტირებული და პოეზიაზე შეყვარებული, ბიჭი, რომლის ლამაზი ფეხებიც ქალებს გონებას აკარგვინებს, დედოფალს კი ტვინში სამუდამოდ ებეჭდება. ორლანდო კარგად ირგებს დედოფლის აღტაცებასაც და ქალების სიყვარულსაც, სანამ რუსი მოღალატე გოგონა არ შეუყვარდება. დიდი იმედგაცრუებისა და შინაგანი ტანჯვის შემდეგ მთავარი პერსონაჟი ლეთარგიულ ძილში იძირება. მკითხველი გრძნობს, რომ ორლანდოს გამოღვიძება აუცილებლად ახალი ეტაპის დასაწყისი იქნება, მაგრამ არ იცის, როგორი იქნება „ახალი ორლანდო“. ენერგიით სავსე მებრძოლი კაცი, რომელმაც ბოლოს და ბოლოს ღალატი მოინელა და მზადაა, საგმირო საქმეები ჩაიდინოს? თუ პირიქით, ცხოვრებაზე ხელჩაქნეული ადამიანი, რომლისთვისაც აღარაფერს აქვს მნიშვნელობა?     წიგნის ამ ეპიზოდში ვირჯინია ვულფი გასაოცარ გარდატეხას გვთავაზობს: ორლანდო იღვიძებს. თუმცა, ის არც მებრძოლი კაცია და არც ხელჩაქნეული. ორლანდო კაციც აღარ არის - ის ქალია.     სანამ ავტორი ქალი ორლანდოს თავგადასავლებს და ცხოვრებისეულ ისტორიებს მოგვიყვებოდეს, საკმაოდ დიდი მონაკვეთი ეთმობა იმ ცვლილებებისა და განსხვავებების აღწერას, რაც კაც ორლანდოსა და ქალ ორლანდოს შორის არსებობს. სინამდვილეში მთავარი პერსონაჟის ფიქრები და ანალიზი კაცების უპირატესი მდგომარეობის, სექსიზმის, ქალთა უუფლებობის, შეზღუდვების და სოციუმის მიერ ქალებისთვის შექმნილი უაზრო ყოფის წარმოჩენას ემსახურება. გემბანზე მყოფი, ფიქრებში ჩაძირული ქალი ორლანდო ამბობს: „ერთადერთი, რაც შემეძლება, მას მერე, რაც ინგლისის მიწაზე დავდგამ ფეხს, ისაა, რომ ჩაი ჩამოვასხა და პატივცემულ ბატონებს ვკითხო ხოლმე, აბა, როგორ გირჩევნიათ, შაქრით? ნაღებით?“     თუმცა, ინგლისში დაბრუნებული ორლანდო არ ცხოვრობს თავისი თანამედროვე ქალების მსგავსად. საზოგადოების მიერ დაწესებული სტანდარტებიდან ორლანდოს ქმედებების ნაწილი „მამაკაცურია“, ნაწილი კი - „ქალური“, და აშკარაა, რომ ამით წიგნის ავტორი პირადი არჩევანის თავისუფლებას უსვამს ხაზს.     სქესის ცვლილება მთავარ გმირში ღირებულებების ცვლილებასაც იწვევს. (თუმცა, ეს შეიძლება არა სქესის ცვლილებასთან, არამედ დროის გასვლასთან და ასაკის მატებასთან იყოს დაკავშირებული. ორლანდო ხომ სამ საუკუნეს ცხოვრობს.) ორლანდოს პიროვნება კი არ იცვლება - ის ისევ რჩება მეოცნებე ბავშვად, რომელსაც არ ადარდებს კარიერული წინსვლა, წარმატებები და საზოგადოებაში ადგილის დამკვიდრება, ეს ყველაფერი გარედანაა თავსმოხვეული. ორლანდოს რეალური მისწრაფება წერასა და ლიტერატურაშია. ის მაშინაა ბედნიერი, როცა წერს და მისი ყველაზე მძაფრი ემოციებიც მისსავე ტექსტებს უკავშირდება...     საინტერესოა, რომ „ორლანდო“ ვირჯინია ვულფმა ვიტა სეკვილ-უესტს მიუძღვნა, ქალს, რომელიც უყვარდა და რომელთან ურთიერთობამაც თითქმის ოც წელს გასტანა. მოგვიანებით სეკვილის შვილმა, ნაიჯელ ნიკოლსონმა რომანს „ლიტერატურის ისტორიაში ყველაზე გრძელი და მომხიბვლელი სასიყვარულო წერილი“ უწოდა, და თუ ვულფის წინააღმდეგობებით აღსავსე პიროვნებას და საკუთარი სქესისადმი რთულ დამოკიდებულებას გავითვალისწინებთ, აუცილებლად გაჩნდება კითხვა: ვისი ბიოგრაფიაა ეს ფანტასმაგორიული რომანი?     ორლანდოსი? ვიტა სეკვილ-უესტის? ვირჯინია ვულფის?  

მიმოხილვები და კომენტარები:

19 .90 ¢
ან შეიძინეთ 199 .00 ბონუს ქულით
კალათაში ჩამატება
+ 19.90 ბონუს ქულა
წიგნის შეძენისას
მარსელ პრუსტი

სვანის მხარეს

იოჰან ვოლფგანგ გოეთე

ფაუსტი l

იოჰან ვოლფგანგ გოეთე

ფაუსტი ll

ფიოდორ დოსტოევსკი

ძმები კარამაზოვები